خارجی گروہ کا سرغنہ شیرین ہلاک، کیپٹن حسنین اختر کی شہادت کا بھی ذمہ دار تھا
سکیورٹی فورسز نے ڈیرہ اسماعیل خان کے علاقے ٹکوارہ میں خفیہ اطلاعات پر آپریشن کر کے انتہائی مطلوب دہشت گرد کمانڈر سمیت 9 تکفیری وہابی خوارج کو جہنم واصل کر دیا۔
پاک فوج کے شعبہ تعلقات عامہ آئی ایس پی آر کے مطابق، سکیورٹی فورسز نے خفیہ اطلاع پر ٹکوارہ میں 6 اور 7 اپریل کی درمیانی شب آپریشن کیا، جس دوران فائرنگ کے تبادلے کے بعد 9 کالعدم لشکر جھنگوی کے دہشت گرد ہلاک ہو گئے۔
آئی ایس پی آر کے مطابق ہلاک شدہ خوارج سے اسلحہ اور گولہ بارود بھی برآمد ہوا۔ ہلاک دہشت گردوں میں خارجی گروہ کا سرغنہ شیرین بھی شامل ہے، جو قانون نافذ کرنے والے اداروں کو انتہائی مطلوب تھا۔
شعبہ تعلقات عامہ کے مطابق، دہشت گرد شیرین کئی بے گناہ شیعہ شہریوں کی ٹارگٹ کلنگ میں ملوث رہا ہے، اور وہ کیپٹن حسنین اختر کی شہادت کا بھی ذمہ دار تھا۔
آئی ایس پی آر کے مطابق علاقے میں کلیئرنس آپریشن جاری ہے، اور پاکستانی فورسز دہشت گردی کے مکمل خاتمے کے لیے پرعزم ہیں۔
