سوشل میڈیا پر اداروں کو دھمکیاں دینے والا لشکر جھنگوی کا دہشتگرد سی ٹی ڈی نے گرفتار کرلیا، دہشتگرد بہت عرصہ سے مطلوب تھا
سی ٹی ڈی انٹیلیجنس وِنگ نے کراچی میں تاج کمپلیکس کے قریب کارروائی کرتے ہوئے کالعدم تنظیم لشکر جھنگوی کے ایک اہم کارکن خلیل الرحمان کو گرفتار کرلیا۔
سی ٹی ڈی کے انچارج راجہ عمر خطاب کے مطابق ملزم سے اسلحہ بھی برآمد کیا گیا ہے۔
سی ٹی ڈی حکام کے مطابق گرفتار ملزم کا تعلق نور ولی اللہ گروپ سے ہے اور وہ افغانستان میں دہشت گردی کی تربیت حاصل کر چکا ہے۔
ملزم نے گزشتہ سال دسمبر میں مزارِ قائد سمیت کراچی کے مختلف علاقوں کی ویڈیوز بنا کر افغانستان بھیجی تھیں اور سوشل میڈیا پر وائرل کرتے ہوئے یہ دھمکی دی تھی کہ ”ہم کراچی آ گئے ہیں“۔
سی ٹی ڈی نے مزید انکشاف کیا کہ ملزم نے ایک پرچی پر ”Karachi Coming Soon“ لکھ کر بھی وائرل کیا تھا۔
اس کے علاوہ، ملزم کراچی کے علاقے ڈیفنس میں کالعدم تنظیم لشکر جھنگوی کی چاکنگ میں بھی ملوث پایا گیا ہے۔
راجہ عمر خطاب کے مطابق ملزم کو انٹیلیجنس معلومات، تکنیکی شواہد اور سی سی ٹی وی فوٹیج کی مدد سے گرفتار کیا گیا ہے۔
سی ٹی ڈی کا کہنا ہے کہ مزید تفتیش جاری ہے اور ممکنہ طور پر ملزم کے دیگر ساتھیوں کی بھی گرفتاری عمل میں لائی جائے گی۔
